A Organización Colexial

QUÉ É UN COLEXIO PROFESIONAL

Un colexio profesional é unha corporación de dereito público, que pola súa natureza exerce funcións público-privadas. Ao seren constituídos como tal, os colexios profesionais sitúanse entre a Administración, as persoas colexiadas e as persoas consumidoras e usuarias.

Os colexios profesionais son institucións recoñecidas pola Constitución española (art.36) diferentes en natureza e funcións a todas as demais. Por tanto, non son nin asociacións (art. 22), nin sindicatos (art. 28), nin asociacións empresariais (art. 7), nin fundacións (art. 34), nin organizacións profesionais (art. 52). Son corporacións de dereito público cunhas funcións moi específicas e necesarias no seu papel de entidades de vertebración social.

A Constitución española, no artigo 149.1.18, reserva ao Estado a competencia sobre as bases do réxime xurídico das administracións públicas e, no artigo 36, prevé que a lei regulará as peculiaridades propias do réxime xurídico dos colexios profesionais. A lexislación básica nesta materia, dictada polo Estado, atópase recollida na Lei 2/1974, do 13 de febreiro, sobre colexios profesionais, coas súas modificacións posteriores.

Son fins esenciais das corporacións colexiais: 1) a ordenación do exercicio das profesións, 2) a representación institucional exclusiva das profesións cando esteas suxeitas a colexiación obrigatoria, 3) a defensa dos intereses profesionais das persoas coelxiadas e 4) a protección dos intereses das persoas consumidoras e usuarias dos servicios das persoas colexiadas.